ದಾಸರೋ ಹರಿದಾಸರೋ

-ಶಿಶುನಾಳ ಶರೀಫ್

ದಾಸರೋ ಹರಿದಾಸರೋ             ||ಪ||

ದಾಸರೆನಿಸಿ ಧರ್ಮ ಹಿಡಿದು
ಆಸೆ ಕಡಿದು ತೂರ್ಯದಲ್ಲಿ
ಕಾಸು ಕವಡಿ ಕಾಲಿಲೊದ್ದು
ಈಶನೊಲಿಸಿಕೊಂಬುವಂಥಾ          ||೧||

ಸ್ವಾಮಿ ಕೇಶವ ಆಚ್ಯುತ
ಗೋಕುಲದ ಗೋವಿಂದ
ರಾಮ ಕೃಷ್ಣ ಎಂಥ ಪಂಚ-
ನಾಮ ನಿತ್ಯ ಪಠಿಸುವಂಥ             ||೨|| 

ತನುವ ತಂಬೂರಿ ಮಾಡಿ
ಪ್ರಣವನಾದ ಸ್ವರದಿ ಹಾಡಿ
ಚಿನುಮಯಾತ್ಮನೊಲವಿಲೈದು
ಮನೆಯ ಭಿಕ್ಷೆ ಬೇಡುವಂಥಾ      ||೩||

ವರಶ್ರೀಮುಖಮುದ್ರೆ ಎನಗೆ
ಬರಸಿಕೊಟ್ಟ ಶಿರದ ಮೇಲೆ
ಕರವನಿಟ್ಟು ಸಲಹಿದಂಥಾ
ಶಿಶುವಿನಾಳಧೀಶನ ಹರಿ         ||೪||

              ****

ಕೀಲಿಕರಣ: ಎಂ.ಎನ್.ಎಸ್. ರಾವ್

0 ಕಾಮೆಂಟುಗಳು:

ಕಾಮೆಂಟ್‌‌ ಪೋಸ್ಟ್‌ ಮಾಡಿ